اطلبي الوصفه العايزاها

البوست ده فكرتو انو اي زول عاوز اي وصفة اكل عصاير معجنات اي حاجه يتم طلبا في البوست ده واي وحده عارفه ترد وياريت نلقا اكتر من وصفه للحاجه المطلوبه عشان نستفيد اكتر

ارجو التفاعل
شكراِ

يانونه موضوعك جميل وأكيد ح تكون فائدته كبيره لو الناس إتعاونت مع بعض.. نتمني المشاركه من الجميع..

نونة موضوع حلو شديد ، يعلم بنات آخر زمن كيف يعملن اكلات تراثية جميلة ومفيدة
وانا كلو يوم بعمل لكم وجع دماغ بالطلبات
دحين انا عايزة مواصفات علمية لعمل الويكة وبي مقادير
انتم تشوفو كلامي هذا تقولوا البنت دي مستهبلة لكن العكس
الى الان انا ما سمعت وحدة قالت طبق الويكة مقاديره كدة

المشاركة الأصلية كتبت بواسطة المهندسه

يانونه موضوعك جميل وأكيد ح تكون فائدته كبيره لو الناس إتعاونت مع بعض.. نتمني المشاركه من الجميع..

تسلمي يا مهندسه اتمني انو يكون فيه فائده

المشاركة الأصلية كتبت بواسطة المجاملة

نونة موضوع حلو شديد ، يعلم بنات آخر زمن كيف يعملن اكلات تراثية جميلة ومفيدة
وانا كلو يوم بعمل لكم وجع دماغ بالطلبات
دحين انا عايزة مواصفات علمية لعمل الويكة وبي مقادير
انتم تشوفو كلامي هذا تقولوا البنت دي مستهبلة لكن العكس
الى الان انا ما سمعت وحدة قالت طبق الويكة مقاديره كدة

الفاليه المجامله انتي اتدللي في اي وقت

هاك الوصفه

بالمناسبه ماحصل عملت حاجه بي مفادير (شغاله بي نظرية عينك ميزانك) بس بحاول اقدر ليك

الويكه اما حمرا او بيضا اذا بيضا ساهله تعملي سليقه وتفركي فيها ويكتك

اما اذا ويكه حمرا

المقادير :::::

اربعه بصلات كبار
ربع كيلو لحمه
نص كباية شاي زيت
ملعقه كبيره ممسوحه ملح
ملعقه ونص كبيره صلصه
اربعه ملاعق كبيره ويكه او تلاته (علي حسبازا كنتي بتحبيها ويكتا كتيره او شويه ..يعني لغايه ما تحسي انها بقت ويكه)
ملعقه كبيره سكر
تومايتين كبار
اليهارات كسبره مسحونه +فلفل اسود لو كنتي بتحبيه+جوز طيب مسحون (حسب الرغبه )ولو ما عندك التوم كفايه
قرن شطه خدرا او قرنين

مويه حوالي لتر ونص

الطريقه:::

يقطع البصل شرايح دائريه
يوضع الزيت في النار الي ان يسخن ثم يضاف البصل
يقلب البصل حتي يصفر ثم تضاف اللحمه تغطي الحله (النار تكون متوسطه)عشان تشوحي اللحمه وتقلبي فيها زي دقيقتين كده يعني لغايه ما يبقا لون اللحمه رمادي ومويتا تنشف تضيفي المويه والملح
تعلي النار لغاية ماتفور الحله ثم بعداك تخلي النار متوسطه علي هادئه تترك الحله لمدة ساعة الي ان يستوي البصل واللحمه ..
تدوبي البصله بي(مفراكه,كوز نيكل,هراسة فول..الخ)
بعد ما يزوب البصل اضيفي الصلصه واتركيها الي ان تنضج يعني زي تلاته دقايق كده بعداك تجيبي قرن شطه خدرا ترمي فيها وتضيفي البهارات ..

اضفي الويكه الناشفه افركيها (اضيفي الويكه تدريجيا عشان ما تكرضم)تشتيتيها شتيت وتفركي او تحركي دائريا ..(تقدري تضيفي بهارات تاني لو ريحتا ما ظاهره)

بعداك اضيفي ملعقة السكر ..
لو حسيتي الملح ناقص زيدي شويه..

بعد ما ضفتي الويكه اتركيها تغلي شويه والحله فاتحه عشان تعمل ليك وش لمن تشوفي وشها بقا زي يكرمش كده اطفيها ( الزمن من تلاته لي خمسه دقايق )ماتخليها تغلي كتير عشان ما تنقطع الويكه.
اهرسي التوم واطفي الحله وارميه في الوش وغتي الحله ..
بعد ماتعوسي القراصه سخنيها حتي تسوطيها وملحي ..
بالهنا والشفا ..

شكرا يانونة ياريت تورينا وصفة للسمبوسة بالروب

سمبوسه بالروووووب والله مافهمتك ياريت لو عرفتيها تورينا ليها لان عمري ما سمعت بيها