مطبخ مهيرة

رأيكن شنو يا بنات
نعمل لينا مطبخ هنا

ونعمل فيهو اكلات حلوة وحلويات
وكمان مشروبات ساخنة وباردة


يعنى كل واحدة تجيب الحاجة البتعجبا ومن صنع يديها كمان


ابدأ ليكن ولا انتظركن ؟


اها منتظراكن

والله فكرة جميلة يا حفيدة

ويا ريت تكون ابتكارات جديدة يعني ما الحاجات المعروفة

ويا ريت تبدي لينا انتي

من منطلق (البكاء بحرروا اسيادو)

تسلمي يا رايعة

بجيكي صادي..

بالجد فكرة حلوة شديد بس المابتعرف حاجة عن الاكلات تعمل شنو؟؟؟؟؟؟؟؟؟؟؟؟؟؟؟؟؟؟؟؟

دي فكرة ممتازه وبسم الله نبداء : تنبيه : في اي وصفه كوب مقصود بيه كباية طقم اللبن ام يد
فطيرة البلح :
المقادير
4 كوب دقيق سيقا (اسمر)
2 ملعقه كبيره باكنج باودر
ذرة ملح
1 كوب سمن
تلاتة ارباع كوب ماء دافي
1 ملعقه كبيره قرفه مسحونه
سكر ناعم للتزيين
عجوه للحشو
الطريقه
1/ يضاف الملح والباكنج باودر للدقيق ويقلب جيداً حتى تتجانس
2/ يضاف السمن لخليط الدقيق ويحرك باطراف الاصابع جيداً
3/ يضاف الماء ويعجن جيداً
4/ تقسم العجينه الى ثمانيه اجزاء متساويه وتترك قليلاً
5/ تفرد في شكل مستطيل وتحشى بالعجوه وتلف في شكل اسطوانه
6/ تدخل الفرن في صينيه مدهونه بالسمن
7/ تخرج من الفرن وترش بالسكر الناعم وتترك حتى تبرد ثم تقطع حسب الرغبه

ان شاء الله تكون عجبتكم

يابنات شنو الكسل الواحد يجي جعان يلقي المطبخ كرو..

حتي الفيران لملمت عفشا اتخارجت ..

شوف الناقص شنو نحنا نجيبا ليكم (سكر دقيق..الخ)..

مشكورة الاخت حفيدة بت خالد علي الفكرة الجميلة

علي الجزيم الليلي بيتا القوي

شوفولنا إنشاء الله مواصه

الجعلية
وينا جيتك؟
منتظرنك ما تقولى ماشة الواغ واغ



ست الجمال
تعمل العصائر والشاى
قولى كمان ما بعرف



بت الباوقة اللذيذ تفاحا
فطيرتك تمام
اشكرك كتير

عبدالله عمر
المراقب العام
فى مطبخنا؟


الليلة وووووب

عاوزين دقيق سكر لبن كستر بيض جلى
خضار لحمة فراخ سمك
تفاح عنب ......................



شكرا لتثبيت الموضوع

خالد مقاشى
وافضيحتنا
نحن قاعدين وانتو تبيتوا القوى
بقى النار لاخوكى

التطلبه تلقاهو
الفراخ المخلى من العظم (رأيك شنو)
سمك بالخصار
شوربة
سلطات

وكمان نجى للتحلية
كدى شوف عاوز شنو اول واكل بالصحة والهناء
وبعدين نجى للتحلية

الليله جاياكم بي وصفتين للفراخ اختارو البي تعجبكم
الوصفه الاولى : فراخ بالفرن :
1/ يقطع الفراخ حسب الرغبه تسلخي الجلد ويغسل جيداً
2/ تجهزي خلطه مكونه من الاتي :
كوب زبادى + صلصة طماطم + بهارات حسب الرغبه + توم مهروس + ملح + قليل من الزيت
3/ يغمس الفراخ في الخلطه جيداً ويوضع في صينية ويدخل الفرن (نار متوسطة الحرارة )
ملحوظة : حاتطلع مويه كتيرة من الفراخ ماتستغربي دي مويتو حايشربها وماتصفيها لانها تحتوى على طعم الفراخ والبهارات
الوصفة الثانية : فراخ محمر بالزيت :
1/ تجهزي الفراخ بنفس الطريق السابقه
2/ تسحني العيش الناشف جيداً ويغربل
3/ تضربى بيض (حسب كمية الفراخ )
يغمس الفراخ في البيض ومن ثم تدخليهو في العيش المسحون جيداً ويحمر في الزيت على نار هادئة حتى يطهى جيداً
وبالهنا والشفا

تعالو نعمل فطاير مالحة
المقادير :
6 كوب دقيق الاول
2 ملعقه كبيره خميره
1 ملعقه صغيره ملح
1 ملعقه صغيره سكر
1 كوب زبادي
1 ونص كوب ماء
ربع كوب زيت
الطريقه :
1/ تخلط جميع المواد الجافه جيداً
2/ يضاف الزيت ومن ثم الزبادي والماء وتعجن جيداً .
3/ تترك لمدة ربع ساعة
4/ تفرد وتقطع وتحشى وتلف
5/ تدخل الفرن على نار متوسطة الحرارة
طريقة اعداد الحشو :
1/ حشوه رقم 1 : يبشر الجذر والجبنه والفلفل الاخضر
2/ حشوه رقم 2 : يقطع البصل ناعم ويقلب فى الزيت وتضاف اللحمه المفرومه والصلصه والبهارات وتترك على نار هادئة حتى تتشرب ويضاف اليها الفلفل الاخضر للنكهه .

شنو يابنات الحاجات دي ماعجبتكم وللا نمتو ياكسلانات الرجال ديل بشيلو حالنا اتحركو شويه

والله يابت الباوقة انا جعت وداير فرخة لكن تكون مسلته سلات فوق الدوكة ما النوع الفيهو اللغاويس دي زبادي والكاتشب .
زمان في البلد كان اندفقت نقطة لبن يقولو لك كب فوقة شوية مويه وقول اندفق الشر عشان ماتفتح عيون الشواطين
الا الزمن دا بقى اللبن عادي يلخبتوهو في اي حاجة ( فواكه باللبن زبادي مع اللحم والفراخ * زبادي مع الفول * ويللا

والبنوت ديل شكلهن حنكوشات مابيقدرن على عواسة القراصة والكسري المرة
زمان القراصة اتنين بوصة ويقسموها وكت يقلبوها بي شوكة تمر طويلي وتسمع صوتا لمن يقلبوها تسوي البز
شكرا بتنا والمرة الجاية وصفة اخنا وسخيني وقراصة بي ملح وسمن
سلام لاهلنا في الباوقة تكاوين وجرانيس وحواشات وعموم الباوقة

بت الباوقة اللذيذ تفاحا
(عندكم تفاح هناك؟)

نشكرك على الوصفات السمحة وكتيرة
وعلى النشاط والفرخة والفطيرة


شفتى الرجال ديل لا بيعجبن العجب ولا الصيام فى رجب
شوفى ناس خالد ديل
سويتى الفطيرة
قال داير فرخة
الفرخة هديك بهناك
قال لا دايرا مسلتة فى الدوكة

آخر شئ قال قراصة وسمن

اها خالد ده نسوي ليهو شنو؟

شكرا ليكم الاتنين

لسه نحن مع الجداد
فراخ محشية
المقادير
فرخة
جزر وفلفل اخضر
بيض مسلوق (3)
ملح وبهارات

الطريقة
نجيب الفرخة ونشقها من الظهر لنخلى العظم
يعنى حنخليها لحمة من غير عظم
وبعد كده شكلها حيبقى زى الكتاب المفتوح
نتبلها بالبهارات
ونضع مفروم الجزروالفلفل
ثم نضع البيض بعرض الفرخة
ونلفها فى شكل اسطوانى
وممكن نخيطها بالخيط
او ننمسكها باعواد الاسنان
ونسلقها وبعدين نحمرها
ولما تبرد نقطعها
حيطلع شكل دائرى ومن جوة خضار ومن جوة شكل البيض المسلوق
ونخت معاها بطاطس محمرة
وبالهناء

التفاح مانحن ذاتنا كلك نظر ...
والله يالحفيده خالد دا بس نسوي ليه سخينه بي الكسره رايك شنو ؟؟؟
نغير من الفراخ للسمك ....
المكونات :
1/ سمك من غير تقطيع يعني سمكه كامله
2/ من خمسه الى سته حبات توم (صاحي)
3/ ليمون مقطع شرايح
4/ طماطم وفلفل اخضر مقطعين شرايح
5/ زيت
6/ بهارات حسب الرغبه
7/ عصير ليمون
الطريقه :
ينضف السمك ويغسل جيداً
بالسكين نعمل فتحات مستطيله في السمكه بي الجهتين
نمسح كل السمكه بخليط البهارت والعصير الليمون والزيت واهم حاجه بطن السمكه
نرص الخضار المقطع شرايح والتوم الصاحي داخل بطن السمكه وفي الفتحات العملناها في السمكه
توضع في صينية الفرن وتلف بالقصدير وتدخل الفرن
وبالهناء والشفا

ان شاء الله تكون عجبتكم

لا حول الله
سخيني بالكسري ماقطعتن قلبي عديييل
والله يالحفيدة وصفتك دي لمن ريقي جرى عليها

انا اطلب من السادة الادارة ودالشمالية والجوكر يخصصو ميزانية لشراء المستلزمات من فراخ ولحمةوبهارات وغيرو ويكون الشغل ده موثق بالتصوير ويتم رفعه لموقع الشرح بالصور اما تصفية العهد بعدتصويرها فارجو ان يتم تحويلها لجهات مراجعة ولدينا الخبرة لمراجعتها وتصفيتها تماما بدون اي مقابل
(يعني اسع مثلا الفرخة القالت حفيدتي يشقوها من الضهر وتبقى زي الكتاب المفتوح ويلفوها تاني زي زي البرش ماوقعت في راسي الا اشوفا بالصور )
لكمالتحيا والاحترام جميعا ومزيدا من الاكلات والتبايخ

بت الباوقة اللذيذا
صدقتى فى التفاح ده

مش خالد ده
لسخينة والكسرة يطلع ليك فيهم مية حاجة



طبعا السمكة ام خضار دى عجبتنا شديد

تسلموووووووووووو كتير ابدااااااااااااااااااع والله
بجيكم راجعه.

يحيا جدو خالد
ميزانية وفراخ ولحمة وتصوير
وبعدين الحياكلو منو؟
طبعا العملو
غايتو انت كلمهم
نحن جاهزين

شفت الفرخة المخلية من العضم دى
الشقوها من ضهرا دى
كان ما شفتها قدامى عينك عينك (مافى التلفزيون)
ما كنت بصدق
لكنلسه ما لقيت الفرصة اسويها
ناس البيت قالوا ما بيجازفو