بعد الرحيل ..

بعد الرحيل


وصيتونا عشان ما ننسي = وللا شديرة الحن تتحتحت
ردوا البال شان نتزكركم = وينو البال؟؟ البال ما اتشتت
***
احكي عن الاشواق القادت = روحي علي جيهتكم قفت
وللاّ دموع العين الجارية = بي فرقتكم ويوم ما جفت
بي شوفتكم أطمن نفسي = كلما العين خدَعتني ورفت
حوّق صبري علي أحزاني= لاحاق لا الأحزان اتكفت
***
واغرب شي انه أيامنا بترحل= وتبقي معاي بي رغم رحيلك
وانك ساكني مكامن شعري = وخجلان شعري عشان يحكيلك
وانّهُ القدر الفرّق بينا = اقسم ما يديني... بديلك
وانّه جنان الدنيا تنادي= ويفضل قلبي مصاقر ويلك
***
والأغرب من داكا كأنك =الهة الحب في الرّومان
كم عاشق هام في محرابك = وكم قلب اتقدم قربان
وأنا في موقف شاعر مرهف= لا يعرف للحب عصيان
الا كمان محتار في أمرو = وفي كفراً عانق ايمان
***

وما تنسي اني هويت هواك = وأمسي هواكِ علي زي دين
في كل شاردة انادي عليك= وفي الواردات من صدقي حنين
يا فرحي المارق من حزني = ويا حزني الجواي دفين
سبحان من رسمك في روعة = وأنشأك من موية ومن طين
***
أنقري باب الزكري أكنك = افتحي وادخلي من غير مرقة
غني صدا اياماً منسية =ولامسي الوتر الماب يندقة
أسألي شارعاً دسا الخاطر = يبقي يجاوبك يبقي ويبقي
كيفن كنتي منورة ليلو = وكنتي صباح العيد في الشرقة
***
وكانت في عينيك أحلامي = تشرق وطيفها يلون كوني
أرحل فيها رحيل لا رجعة = مجروح وكان الله في عوني
رغماً دربك ما كان دربي = وانتي اخترتي السكة الدوني
ياني العايشك نبض جراحي = وحزن غناي وزي ما تكوني

مشكوووووووور وماقصرت كلو كلو

شكرااااااااااا ليك

مشكور السيد المدير

واغرب شي انه أيامنا بترحل= وتبقي معاي بي رغم رحيلك

مشكـــــــــــــور يامدير

ابدااااااااااااااااااااااااااااااااع واله يا ود ابنعوف