زمان الحال

زمان الحال وكت يقصد عليك يجور
يشيل فوقك رحال الهم تلف زى ام حليقة تدور
كلامى عن الشمال لو قلتو ما بتسع المعانى سطور
وما شطح الخيال خلانى بالسافل بقيت مغرور
تنقسى كان ارادب خير وكنزا للزمن مدخور
مرق يوم الجفاف امتد فوق اهل البوادى شهور
كانت مرتع الضيفان سبيل للماشى والمعذور
ولا عرب الصعيد الفوق وناسا جات من العتمور
أكباد الابل مضروبة جات قاصداها من دارفور
من بوحات وام روابة تكدح حدها البيبور
خيرا فيها حاق الناس شبعت والقلب معصور
وحاق الجاى بارى الزاملة من طول السفر مضمور
الجود عندهم ميراثو من سالف زمان وعصور
غلامهم من طفولتو يشب على بذل الطعام مفطور
أغاثوا الناس وكل زول انبسط مسرور
فى حال ما بيغيثك فيهو غير زولا عليك مجبور
يطرقوا للمحال ابوابو ما بيتجاروا للميسور
وما فيهم تليف راى فى الجمع لا جار ولا مجرور
فتحوا المدرسة المصرية يوم كان العلم محظور
وما بيرد العلوم الا الهميم المستمين وجسور
وكتين لجنا فى الفيضان مع الشلباية والقرقور
حوتنا الموية حد ما تشوف سدود وجسور
جاتنا قوافلم فى الحال نشيل لا كيل ولا معبور
وخير مبهول كأننا فى سرايا ابو جعفر المنصور
ده الخلانى فوقهم اغنى وانتشى صوتى يبقى جهور
واكون قدامى يوم بيقيفوا فرسان الشعر طابور
قلنا قضا وقدر ولا بد يجى المقدور
وشعبك يا بلادى على الصعاب يوم الفجيعة صبور
مرقنا على الغرب بى رقابنا خلينا العقاب مهجور
وبعضنا بى الشرق بنيانهم انشر ووصل حمور
خلوها الديار فاتوها رحلوا وطابقم مستور
سكنوا هويد فيافى وصى مفازاتا خلا وعتمور
ديل أهل الجناين العامرة منقة وبرتكان وتمور
ترد الروح قبل ما تروح تجبر الخاطر المكسور
بنبنيك يا بلدنا ومن جديد نبنيكى تانى قصور
نتشمر نقيف فى الجد لى بناك نتلفح الدمور
نشوف فى ابو قسى مشروع عن قريب يتركب الوابور
يروى زرعنا شان مسرتنا ما تطلع بواقى كسور
بعد ما كان يباس تخضر تنزرع الاراضى البور
تشرب لى الجبال فوقن يبين ساس الحفير محفور

ديل أهل الجناين العامرة منقة وبرتكان وتمور
ترد الروح قبل ما تروح تجبر الخاطر المكسور
بنبنيك يا بلدنا ومن جديد نبنيكى تانى قصور
نتشمر نقيف فى الجد لى بناك نتلفح الدمور