حكاية زول

زولا متلى ما كان حقو يتكلم
والناس فيهو تضحك ساخرة
ان بقى بالحاصل عليه نضم
زول ردتيهو دون خاطرو
لا حسابو لا يدريهو لا يعلم
صبرت وقلت لامانع
يمكن دايرة تتعلم
الا كمان بتبقى مصيبة
لو يوم لاغلط تفهم
أكورك عاد-- واللا أقوم اجيب لى زناد
أولع نار تخليك كوم رماد وفحم
الا حرام.... حرام الزول يضيع روح بنى آدم
لكن برضو خلى يموت
وتمرق روحو منو تفوت
وحاجات زى دى
ما بينفع معاها سكوت
وأخيرلو يموت
وكتين أصله من دون دم
***
قلت أشكيكى لأهلك
تحبسك منى قبال ما أجيب أجلك
اقولك اقيفى بس قبلك
ما تبرينى اسع عاد فى زول سألك
انا اليبرانى دابو مع المعاهو هلك
قايلك واعية اتارى كبرتى بى جهلك
وبعد ده انا ما مهم عندى
اعرفو رضاكى من زعلك
***
اقولك حاجة قبال ما المحن تكتر
اخير ارحل على بلدا طشيش وسفر
اخليلك بلد بى حالها ما ظنيت معاكى صبر
واصبر ليه وربنا خلى نص الواطة يبسوا بر
عشان المتلى ما ينذره فى الدنيا ويحوشو بحر
يشرد ماشى فوق كرعيهو ان بقى ما لقالو قطر
يخارجو من البلد يطفش يقوم ينجر
ومن قلتى لى رايدانى بقيت تلتين نهارى قهر
وفى الناس الكبار انهر بقيت وبقيت كمان اسكر
كلو عشان اطانش همى مانى كفر
بقالى نعاس ومراتا عديل هلواس ومرة فقر
وانعس كيف انا آذان العشا البدرانى اعدو سهر
***
دى حالة زول تريديهو
تبنى معاهو الآمال تعلى بناك تزيديهو
بناك أحسن تهديهو
والباب البجيب الريح أخير لك كان تسديهو
***
ولا كمان اهدو انا العلى الهديم بقيت مجبور
واخليلك مكان بنيانو هاوية وخور
اخلى جحور تقول محفور
اخير لى كتير من بعدين يقولوا على فلان مكسور
دى كيسة كيف أكيد القصة فيها كجور
***
ما تخليك قدر حالك قبال
ما تفوتى عقلى اشتت ليك آمالك
اخليك يكتر اهمالك
تقولى على فى سرك ده زولا للجنون مالك
وليك بعد ده كلو اقول مالى انا بالهوى ومالك
مادام ما بريدك انا متشعلقة فيا نان مالك
***
خلينى الأشوف اتحلى قبال نمشى لا جوة
واخارج نفسى من الجاتنى غصبا عنى بالقوة
ده دربا خايف ان باريتو يوم يرمينى فى هوة
وخليك من حكاية الريد تبقى البينا زى خوة
***
زياراتك تزيدنى قلق وامانى انا كنت زول هادى
وانا المعروف بحب الناس زى اولادى
تقعدى معاى يرحل فكرى فى وادى
واخليك انتى فى وادى
واقوم امرق والبشوفنى كلو يقول ويحلف انى ما عادى
وان جبرتنى الظروف اقعد افتح جنبك الرادى
واونس فيك من اب نفاش ولا غادى
***
برضو تقولى معجبة بى معاى الونسة جذابة
وما تقولى لى انت ظريف دى عارفك فيها كذابة
أصلو الناس ومفروض بى بعض تعجب
يبقى الريده شن جابه

خلينى الأشوف اتحلى قبال نمشى لا جوة
واخارج نفسى من الجاتنى غصبا عنى بالقوة
ده دربا خايف ان باريتو يوم يرمينى فى هوة
وخليك من حكاية الريد تبقى البينا زى خوة

الف الف شكر والله

ابداااااااااااااااع

الف شكـــــــــــر