هجرة قمري

تراك يا قمرى تصدح فوق عديلك
تبوح بى هواك فى لحظات مقيلك
فى شتاك وصيفك الهم مابيجيلك
لا ملامة تجيك لازولا يقيلك
ما سمعنا بكاك يوم لا صوت عويلك
والفرح لو كستو ساهل بتلقيلك
بالعلى يا قمرى جيت داير اشتكيلك
منك آخد العبرة شان أسلك سبيلك
لو بقيت فى مكانى ما كان شلت حيلك
لا بتطير يا قمرى لا كرعيك تشيلك
الغصون ترميك وعش ما بيتبنيلك
والحزن يغشاك ما بيطرب هديلك
بيك تضيق الدنيا يتبهدل حويلك
وحالك أشبه حالى يانى بقيت زميلك
الا عاد يا قمرى ما تفارق خميلك
وأوع تنوى الهجرة ما دايرين رحيلك
فوق غصونك قوقى وأشرب سلسبيلك
كل وساع الدنيا والكون كلو هيلك
بالقناعة الفيك رضيان بى قليلك
واليقين وراك انو الله كفيلك

لا بتطير يا قمرى لا كرعيك تشيلك
الغصون ترميك وعش ما بيتبنيلك
والحزن يغشاك ما بيطرب هديلك
بيك تضيق الدنيا يتبهدل حويلك