جنى امدرمان

نحن مانا لميم من عريب ناس فحم واقود ناس حطيب
نحن من اصل المجاذيب ناس ابل يعرفنا الوضيب
نحن ناس طنبور ناس دليب ناس سدارى عمم جلاليب
ناس تمور وقموح قواسيب خيرنا تشهدبو القساسيب
مافى بينا الراجل الضنيب الاضينى البسرق الجيب
مانا ناس ونسات فى المغيب نطق مع البنوت قرقريب
عزة الله الدارى بالغيب وتانى بى نبى الله الحبيب
نحن عند الوكرة ام لهيب سيفنا يأكل المو فى النصيب
الجانا منك كان جد غريب قولى فزع الناس شن يجيب
بلا شماتة ووجع قليب صون لسانك وكون زول اديب
اوعة تقرب وكر الدبيب
جنا امدرمان ابقى شوى شادى الحيل
شيل من ايدك المفدوعة عاج الفيل
خليهو الدلال للريل
ما بتعرف بلا التجميل
تعال فد مرة زورنا هناك عشان تعرف حضارة النيل
ناساً بالطوارى قسم يجسرو السيل
تعال شوف السواقى النايحة طول الليل
والتور البسوق ارقوق وتب مو فاضى فى الفتيل
يملأ عيون جداولنا ودموعنا تسيل
ولاد ترهاقا نحن هناك تراثنا اصيل
ناس بركاوى تن جريدو فادعو الشيل
اهل المنقة والمشرق مروق بالصفوف قنديل
اكلنا قمح وكلامنا سمح ويانا اهل حضارة النيل
وكت الحارة تتوتر وتسمع لى سيوفو صليل
تغنى مهيرة فوق الخيل
يتبل الركاب بالدم انين الخيل يقصو صهيل
جنانا بتلقى يملأ العين يزيد الكيل
ويسقى عدونا من شلاخنا نار الويل
ويبقى شلخ شوايقة اصيل
اصلو الخوف يمين مو هولنا الاعور نقولو عديل
نحن اولاد بعانخى وشبكة ابونا صبير
امنا ياها بت عبود صباح الخير
بناتنا يمين نعومة حرير
عويدن بان وغلاوة اكسير
وسمحات هن بلا منكير
حلات ايدن مع حبل الدلو الفى البير
كيف الحوش يرشن داجى ليهو الجير
دهينة الودكة فوق راسن تقطر بالشمس قطير
تسيل فوق الرحط تتدلا تملا عجاجى عاد للدير
نحن اهديل براك زورنا وتعال اعرف حضارة النيل
شن داير تقول يا نذار ..
بتسمع بالاسود فى الضيقة نحن اولاد على الكرار
اسأل كورتى عن تاريخنا عشان تحتار
وكت الباشا جانا هناك بلا انذار
مدرع وكان سلاحو النار
وكت الحارة ما بنعرف شى اسمو هظار
يمين لاقيناه بالفرار ..
واشعلنا المراكب نار ..
امانة يا جنى خسرلو خسار
ورجع لى بلدو شايل العار
نحن هاديل عشان تعرفنا يا البيقولو ليك نذار
صحيح لو قلته عننا اشو لا اسع نكوس التار
حليل الطابية يا امدرمان
حليل كررى وحليل ابوعنجة يا حمدان
حليل المهدى واسلافو اللى كانو زمان
حليل جيش الغبش يا هوان
جناكى الليلة يا امدرمان
فى جواى هز كيان
تعال شوف الغبش يا هوان
لا عرفو الماييج ضمة لافى دهان
الطاقية فوق الراس وبارمين عمة الدبلان
وعند الضيق امانى يا جنى امانى يا وليد امانى حنان
جنا امدرمان وليد ابو عاج
حصل يا وليد اكلت الكسرة من الصاج
نزل فى النيل تعوم راقد قفاك وفاج
حصل يا وليد نزل فوق ضهرك الكرباج
وجرب بالقرض تتداوى زى ما نحن لينا علاج
ما بتعرف بلا المكياج
واكلك يوت من الطوة بين كبدة وحمام ودجاج
جنا امدرمان هوى يا جنى
ما بتعرف بلا اكل الطوستى والبامبى
والبسبوسة والباسطة ام عجينا نى
بتعرف ترقص الجامايكا يا ابو شعرا مبرم طى
هوى يا جنى بتسمع بى بلاد الصى ؟
تعال فد مرة زورنا هناك عشان تعرف نحن ازى
نحن ايقاع دليب ينبح يشق الحى
وزغرودة فرح مصحوبة بالحمبى
وحس سوط العنج يصهل يفتق فوقنا جرحا نى
وفوق جرحا جديد يا دوب تخلف الكى
ودمنا يروى أرضنا رى
وحس بنوتنا مع الزغرود يسون سى
نحن اها ديل ايانا جنات بلاد الصى
جنا امدرمان شوف غباتو وجنو
مو عارف الشوايقة اظنو
الذرة والقمح زارعنو
الميرتق بنشرب منو
السيف والدرق راكزنو
للغارة الحصان ساعنو
والاسد البحجر الغابة نافش شاربو شافعنا البيرضع دابو يقلع سنو
اخير يا جنى لا تفلع وبيتكم من قزاز ساونو

غربة وارتعاش كل الشكر علي التوثيق الجميل

بس ياريت تراجع قصيدة جنا امدرمان ما بين الاشعر محمد سفلة والشاعر عبدالله التاج

مشكور يارائع وياريت تتحفنا بيها صوت

مشكوووووووووور

مشكور اخ غربه وارتعاش
قصيده جميله بس لو وجدت في مقطع ياسلام لمن تسمعا من خشم ود سفله
انا سمعته منو وغايتو شكلو ممغوس من جنا امدرمان مغسي

الف الف شكر

تسلم يارائع

خليهو الدلال للريل
ما بتعرف بلا التجميل
تعال فد مرة زورنا هناك عشان تعرف حضارة النيل

شكرا ليك غربة وارتعاش