خالد عبد الله بخيت_سكه رحيل

نحن البينا بينا وبينا بينا المستحيل
عبر المسافات البتصرع كل ميل
عبرالمدائن والمتاهات والزمن والأماني الغالية والحلم الجميل
***
لا ودرك مني البعاد والدنيا في سكة رحيل
لا جيتي خاطري عشان أجيك بي لهفة الريد النبيل
***
وأنا في سجون ريدك دوام أبد الأوابد ليك نزيل
لا قادر إنتظرك شجون لا إخترت من غيرك بديل
***
كيفن تفوتي نهار عشم وإتوسدك مأساتي ليل
ما طال ما طالك أمل والباقي من دربك طويل
***
خليهو فيكي الإنكسار وإتقبلي الشكر الجزيل
وآ ضيعة القلب الهواك وآ حسرة الريدة القبيل
***
آمالي لو ماتت تواه تأويني في قلبك عليل
خليني أمشي على السراب الرجعة امست مستحيل
***
أحزاني زادتني إكتئاب وجسيمي يتلاوح نحيل
يامانعة أنسامك تمر كيف غصون ريدك تميل
***
ياسارية في دمعة بكاي أقربلي من قلبك سهيل
ياناطقة بي عشقك سكات ويراعي بي صمتك كفيل
***
يارايعه زي وعد الرزاز الشال ويوم لاقى النخيل
بين التقانت والضفاف والنيل مقاسمو السلسبيل
***
هادنت أطيافك دموع شديت يقيني سرجتو خيل
خيمت .. وجدان الأسف شداني للأحزان صهيل
***
من خيل معاناتي المعاك والباكيه اتلاقت صليل
إتعمقّت وجداني هم معذورة جافاها الخليل
***
ياغُرة العين السواد ياربة الخد الأسيل
يا منبع التيه والدلال يا ناعسة الطرف الكحيل
***
فوق ضلك الرامي إنتظار يا وجعه خليتو المقيل
خليتو حبك لو هواك خلاني بي وعدك ذليل !!

وبرضو بينا المستحيل ،ولما باكر فينا يصبح نكتب انوار الخميل ، ورغم اهاتنا وجراجنا فتنا درب المستحيل..........

ياسارية في دمعة بكاي أقربلي من قلبك سهيل
ياناطقة بي عشقك سكات ويراعي بي صمتك كفيل