التحت الرماد

أح ما بتشبه الزول المسافـر لهـلُـو
زولاً ماش يقيـّل ويمسى في ضل نخلو
شن لازم الوحيـح والزول بشوف في أملو
إنو وسط وليداتـو وضـرا وست عدلـو

*****
كلامك ياعوض دا ختا وقصِـد عانينـا!!
ليه بتحرش الآهات تشكّعـا فينــا؟؟
عباس صح صدق محّقْ وحيحنا علينا
أصبر خـلّو بس لامن تعود وتجينـا

****
بالكوم الوحيح راجيك يمين بى كمـَلُو
زى جبل الكحـل مروادنا عاجز َقبلُو
نـاس قبالنا من بحر المتاهات نَهلُوا
ذرة وسط محيط لا سنّدو ولا شَتلُوا

****
يـا والله الحويج شابكلنا " وبعدين"
وهو مربّط حقايبو ونام غرير العين
وبينو وبين يغادر باقي بس يومين
وأسّع شوفو رافل في النعيم لا وين

****
يا عوض الكلام دا وجعنـا ما رضّانـا
وإتْ عارف براك قطر البعـاد رضّانا
داس أجمل أمانى رقدنـا في أحضانـا
من دون شورة لى ليل العذاب مضّانا

****
نسأل اللهْ كـل عصفور يعود لى عُشّو
لا تغشا الريـاح لا إيـد غتاتـة تهبشو
والتحت الرمـاد إنت آ عوض لا تنبشو
والمغبون محـال آهـة أخـوه تفشّو

****
سفـرك دون وحـيح قلّب علينـا مواجـع
ذكرنـا الهنـاك في قريرنا دايماً ساجـع
فاض بحـر الحنين زاد لى عذابنا الفاجع
من شـدة أسـاهو الزول تقول مو راجع
****
الغربـة التجـيب الكربة أسْـوَد يومـا
إسمها زى غراب البين وينعب بُومـا
شن بيجـيبا لى بلـداً عزيزة لزومة
نيلا من الصعـيد يغشى القرير والزومة
****
عباس غنى قـول أطربنـا ياشادينـا
بى آهات عوض دى فطرنـا واتغدينـا
"بعدين" الحويج دى نسيبـا لى بعدينـا
مشتولة قريـرا الرايقـة ينصر دينا
****
ممكونين شديد ياخويا بى داب شـوقــا
هى وسودانى في الاحساس فرد مَعَشُوقا
هبش للسلوك وأنـا للقوافى بسوقـا
لو نقـدر نقـل دين البـلد من فوقـا
****
سودانا أصلو ما غاب لحظة تب من بالنـا
دا البلد العزيـز الفيهو سُترة حالنـا
مشيول في القُلوُب زىْ ما زمانك شالنـا
إلاّ دليل قوافلوا من المراير كـالنـا
****
قمنا نجعـنا زى طير الخريف الفـرّ
قلنا الغربة يمكن نلقـا فيها الـدّرة
روحنا بقت هناك واجسامنا تاهت برّة
نصين إنقسمنا متل نـواة الـذّرة
****
لمتين الرجـوع يا ربى لى أحبابنـا؟؟
ليهم نحن قـدر الكون فتحنا رحابنـا
رسلوا لينا أطيافن تـدق فـي بابنـا
شالت نومنا جـات سكنت وسط أهدابنـا
****
أح بالصح نقولا ونحن يوت بنـشاشى
مو آهـة المستف وللحـبايب مـاشـى
آح زول في الجمر قابض الرهاب واللاشى
مالكانى ومكرّسة في عضـاى ومُشاشى
****
لكن الأمل في الرجعـة تـبْ مـا قـلّ
لى بلد الشرف والجـود نقـول مـا دلاّ
لى صيدا النزل في الدارة للايـد تــلاّ
نسأل الله شوفـتا حتىّ لـو كان طـلّة

ya gale margeen fi gorba magbooreen khaleeha mastora

الف شكر وتحية لي الاستاذ محمد المهدي حامد

لمتين الرجـوع يا ربى لى أحبابنـا؟؟
ليهم نحن قـدر الكون فتحنا رحابنـا
رسلوا لينا أطيافن تـدق فـي بابنـا
شالت نومنا جـات سكنت وسط أهدابنـا

مشكووووووووووووووووووووووووور

جزاك الله خير الجــــــــــزاء