عشى البايتات

عشا البايتات كفاك اعوج تعال راجع تعال
وراك مرق الصبر سوس واكيد كل الرصاص واقع تعال راجع
بخاف لك من قــفاك يضيع وراك زي ما هناك ضـــايع
مشتت لا فهم لا راي شبعان والوراك جايع تعال راجع
سحـــابا شتتو الاعصار مسافــــر في سمــــاك صابــع
تتاجر في العمر وايامو خسران شاري او بايع تعال راجع
زمان كنت القعر والراس نازل في البلـــد طالـــع
واسع حليلك حليلك يا البقيت تابع تعـــال راجـــع
***
كيف الزول يقاسي الغربه ..ما بين نوح انين وشقا
يلقي رويحتو ودر عمرو لا ارتاح لا مراضو لقا
كـــم من فينا شال احـــلامو شـالع بالامل بــرقـا
قام قاصد الريال وبهاه سوا الحج قتا ودرقـــــا
باع الفي المراح والمسري حتي الفي الايدين مرقا
خجلان قال تقيلتي وراي يحفظا ربنا الخلقا
كم من فينا همل دارو اسرتو للضياع طلقا
غرقت في الديون خلاها مكشوف للخلوق ورقا
فينا الام ولادو وراه باعت سلسلا وحـــلقا
شالت فوق هموما الفوقا شوقا وحرقتا وقلقا
الله من مرارة الغربه من دفيرا من صبقــا
من تعب شبابنا الزاهي اياموالنضار محقا
فيها جراحنا كل ما تبري ما نعرف شنو الفتقا
اما الروح من الشايلاهو تمرق لو في زول نتقا
غايتو انا من بلاد الغربه روحي الله خلاص عتقا
راجع لبلادا ديمه حامدي وراضي بي رزقا
للجد الوريفه الرحمه للعرجونه للابقا
للوسط الاهل تلقاها لو كان حتي بي مرقا
مشتاق لتراب اوطاني لاحساسا لصدقـــا
للبهم التصيح في مراحا للنيل التسابو بقا
لقوز الرمال والشــله لقعــدتنا في حلقـــا
لختفة تعوس الوالدي قبال ما تصل طبقا
اعرض في البلد بي بطولا دي الماليني تبع وشقا
لاخوف هيبه من الكشه لاقي النوم من الشفقا
انعم فيها بالحريه دي المن غيرا مافي لقا
والمو شاد رحالو وراي مويتو علي السراب دلقا
نسلم فيك ياسودانا من مسك الارض عزقا
شتت في التراب دم قلبو بي حن الابوه سقا
يسلم فيك من ضارك شالك في العيون حدقا
دنقر لتقيلتك شالا عندو امانا ما سرقا
لو باقي لي يوم في الدنيا ومنو وتزبل الصفقا
مابندم بعد القاك وانزر روحي ليك صدقا
اخر امنياتي بقولا لو بيناتنا مافي لقا
اسمك خشمي لو كان متا يبقي اخر حروف نطق

مشتاق لتراب اوطاني لاحساسا لصدقـــا
للبهم التصيح في مراحا للنيل التسابو بقا
لقوز الرمال والشــله لقعــدتنا في حلقـــا
لختفة تعوس الوالدي قبال ما تصل طبقا