في غرامك لي شريك

ما كنت قايل في غرامك لي شريك لكن عرفتَ وتاني ما برجع إليك
***
والله كل ما إتذكرك إتذكر إنو معاي شريك
زي ما قليبي أنا إشتهاك تلقيهو أيضاً مُشتهيك
قولي لي ذنبي وذنبو إيه ما الناس جميع مفتونة بيك
طماعة يا ست الجمال كيفن تطيري مع جريك
***
ما كل غرام بيظل غرام .. ما كل بريق سن إبتسام
ما كُل خطوة إلى الأمام أحيان بيتعثر مشيك
قولي لي كيف قلبك سمح يجرح قليب ليك إنشرح
ودرتي زول كايس الفرح عيشتيهو في دنيا الترح
مُستني كان تبقيلو غيمة تظلي من حراً لفح
لكن بقيتيلو لو الهجير في وادي منو الغيم نزح
***
لو قيس سِمِع ما كان بِجن كان يرثى لي حالي ويحِن
كان يبكي زين دمعاتو تهطل فوق عيونو وتغسِلن
ما بيرضى إنو الغرام يصبح سلع نتبادلِِِن
***
ورغم الحصل... قلبي الأمين ...
لا راضي لي نفسو الخِداع لا راضي لي غيرو الأنين
وإحساسو يا ست الجمال ما بيرضى غيرو يعيش حزين
***
وأنا أصلي من ريدتك قنعت وآخر وصية بقولها ليك
أبقِي عشرة على البريدك لا تخيِّبي ظنو فيك
أبقِي زي ليلى وبثينة الغرور لا يعتريك
قالو عاقب الريد عداوة وأنا من عداوتو بخاف عليك

الف الف شكر ابراهيم

شكرآ الرائع ابراهيم علي النفحات الجميله وحقيقه جادالله عثمان شاعر رقيق ورجل مسامح لابعد الحدود وخير دليل علي ذلك انه في هذه القصيده فضوليات عجيبه في قولهوذي ماقليبي انا اشتهاك تلقيهو ايضآ مشتهيك وريني ذنبي وذنبو ايه مالناس جميع مفتونه بيك )،ولعله قد بلغ ذروت حلم صدره في تسامحه ولم يكتفي بذلك في هذه القصيد بل خوفه علي الذي خانه ان يتجرع كأس الخيانه في قوله(قالو عاقب الريد عداوه انا من عداوتو بخاف عليك) رحمك الله يانخلة الشعر الشامخه رحمك الله جاد الله عثمان.

ما كل غرام بيظل غرام .. ما كل بريق سن إبتسام
ما كُل خطوة إلى الأمام أحيان بيتعثر مشيك

لو قيس سِمِع ما كان بِجن كان يرثى لي حالي ويحِن
كان يبكي زين دمعاتو تهطل فوق عيونو وتغسِلن
ما بيرضى إنو الغرام يصبح سلع نتبادلِِِن