فجعه وفجأة

كلمات حنين للماضي خطاها اليراع
ودموع حسار تنجارا من غير انقطاع
ما إنت عجلت ومشيت لا همسة لا كلمة وداع
خليتني في بحراً كبير زورق يشابي بلا شراع
خليتني في دنية عذاب في ظلمة في لجة وصراع
بعدك حياتي بقت كهوف عدماني والله الشعاع
يا نخلة ليه ... يا دنيا ليه ؟
يا نخلة ما كان عيب عليك رباكي سوالك قلب
ومن ظلام حوراً صغير خلى النسايم بيكي تتلاعب لعب
الهابي من جهة الشمال والجايي من تالا الغرب
الموت دا ما كاسات تدور بيناتنا لا بد تنشرب
ولا بد من كأسك يجيك كان في سرير أو في حرب
لكني برجع تاني أقول كيفن عليك هان ما صعب
يا نخلة ليه ... يا دنيا ليه ؟
يا دنيا كم جمعتي ناس في بهجة باكر تتفرق
مخنوقة عن ساعة الوداع عبراتا سدت في الحلق
ترجع سريع تنسى الحصل عارفي البفوت ما بيتلحق
لكني كيف أنسى القديم والكية فوق الكية دايماً تنطبق
وريني عاد كيف الخلاص ما طال لو لمع البرق
تلقى القليب داير يطير بالشوق مقرب يتحرق
يا نخلة ليه ... يا دنيا ليه ؟
يا دنيا أديهو الأمان فد مرة لو كان يقتنع
ما إنتي رسلتي القدر عارفي القدر مابيندفع
وقفتي زي زولاً مشارك في جريمة وعندو فيها أكبر ضلع
ويتعوذ السواها عامل نفسوا لا شاف لا سمع
الدرب الطويل يا دنيا من غير رفيق مابينقطع
واللقمة من غير السرور ما مُرة تب مابتنبلع
بعدك حياتي بقت جبال مخروطة ما أظن تنطلع
يا نخلة ليه ... يا دنيا ليه ؟
خليتني في مشوار وعر تاهت خطاي مابيتمشي
والحلة من بعدك خراب لا تنقعد لابتنغشي
ما الدنيا اصلاً دار زوال ومن القبيح مابتختشي
كم من قلوب كم من نفوس صالاها بي نار الحشي
كم من صغار خلت هدومن بالدموع مترشرشي
يتباكوا فوق زولاً عظيم كان في حياتهم كل شي
لكنوا خلاهم رحل واحدين صغار لا هسي ما عرفوا المشي
يا نخلة ليه ... يا دنيا ليه ؟
يا زهرة العمر الكئيب ما كنت في زمنك مرح
ايام اشوف اشياء بتلمع في العمر وأمشيلا أقول شيتاً سمح
ألقاها يا قطعة قزاز أو قطعة صفيح ساكت قرح
ايام جهل مابتتنسي وذكراها دايماً في الفؤاد مابتتمسح
بالله ما تسيبوا الظنون في زول حياتو تدور شرح
ما اصلوا مهما كان حفيظ لي سروا لا بد ينفضح
وباباً مقفل بالسنين لا بد من يوم ينفتح
والدنيا اصلاً دار جروح والفيها لا بد ينجرح
يا نخلة ليه ... يا دنيا ليه ؟

بعدك حياتي بقت كهوف عدماني والله الشعاع
يا نخلة ليه ... يا دنيا ليه ؟

أخي إبراهيم:

هل من إجابات على هذه التساؤلات الجريحة ؟؟
ليه ..ليه
تحياتي

حميد وكفي
لا تعليق

والحلة من بعدك خراب لا تنقعد لابتنغشي
ما الدنيا اصلاً دار زوال ومن القبيح مابتختشي
كم من قلوب كم من نفوس صالاها بي نار الحشي

شكرا ليك ابراهيم