جرح الزمن

الشوق قطع قلبي الرهيف وآخر شي سوا حجر مسن
يوماتي يجرح فوق جرح كيف يبرأ جرحي مع الزمن
أنا بين ظروفي وغربتي لاجئ أزازي بلا وطن
غنيت لليل مال علي هشيتو صرا لي وحرن
ويا الله من بحر السراب ياخدني شك يرميني ظن
راكز على قلباً ضعيف فوقو الصدر مكبوت كفن
سايق غنم إبليس براي رعاوي في وادي المحن
في إيدي جمرة من الرجاء قايداني والآلام رسن

قدمت لك سبتين وأحد ولي الليلي مستناني أمد؟
وأنا يا حليلي عشان رضاك من طيبتي كت أحسب وأعد
لامن لقيت المادو ليك والشلتي كان آخر سقد
ولي ما فضل غير الحروف ولبستهن جيدك عقد
غنوات من الشوق والشجن تهرد لهاتي وتنهرد
ويكفيني لما يقولوا مات عينيك تبكي على تحد

أنا أصلي مخلوق شان أكون في الدنيا لي فرحك سبب
وأتلقى بدلك قسوتها يومها التجيك بلا غضب
وأكمد جراحي وإبتسم في حلقك أبقي رحيق عنب
ويا بختي كان عينيك رضن كان لي رضاك تاج من دهب
كون فيه إتمايل فرح وأرقص مع الأيام طرب
وفي الدنيا أبقي إنسان جديد غسلني من حزني اللهب

وما أحلى طعم التضحية حين تبقى في زول يستحق
كونك تموت فدى للوطن أو شان حبيب مافيش فرق
غيرن منو البعد الموات في الدنيا تاني بيتخلق
إنسان من النور والجمال جوانا بتشتت صدق
في كل رمشة عين تكون زكراه في الخاطر تبق
وآآآآحسرتي إن ما مت شهيد عينيك زي قلبي الحرق

حقيقة روعة القصيدة وانت اروع وخليك قومى شكرااا

الف الف شكر

والله القصيده حلوه تقطع القلب

---

والله القصيدة مافيها أي كلام وأن اول أمرة أطلع عليها

روعـــــــــــــــــــــــــــــــــه

وأتلقى بدلك قسوتها يومها التجيك بلا غضب
وأكمد جراحي وإبتسم في حلقك أبقي رحيق عنب

أحلي من الحلاوة وأجمل من القمر