سحاب آمالي

من غير زاد وبلا ميعاد
كان منايا أجيكم فجأة رغم الفرقة والابتعاد
كم من حاجة اتمنيتا إلا المولى لي ما راد
وأصلوا الدنيا من ما قمت ما تمالي فيها مراد
لكن برضي صابر وراضي سامع حكمة الأجداد
ودايماً في كلامهن حكمة يا ريت تعرفا الأحفاد
قالوا الدنيا لمان تابا تقطع سلسل الحداد
ولمان تبقى ماشي عليك بي خيط عنكبوت تنقاد
يا حليل الزمان والباسا أيام كنا فيها جُداد
شايلين القصب يا دوبنا دايرين نعرف الأعداد
أيام في زمان الحلة نلعب سكسك الحداد
والطاب حتى حمديرة والحكام والجلاد
يا ريت لسه عايش لحظة تحت الحكمة والإرشاد
يا ريت أصلي تب ما كنت يا ريت القديم لي عاد
ديمة على سحاب آمالي لايح في البوادي بعاد
أسرع في خطاي أمشيلو يتلاشى وأقبل صاد
أول ما أعود لمكاني برجع في القرب يزداد
أعيد الكرة تاني أمشيلوا لكن السراب شراد
فقر في الدنيا كل آمالي غير قلباً رحيم وحاد
مهما بالغت آلاموا تب ما بيعرف الأحقاد
شان كسر الرماح في حزمة يصعب وتنكسر آحاد
مشتاق للبلد والغربة شوقا يفتت الأكباد
مكبوت الشعور أنا عشت دايماً في كدر وسهاد
أما الليلة يجرح قلبي من صمتاً عليهو اعتاد
في حباً دفين واراهو طبعي الديمة كلو عناد
حب الساقي حب اللوبي حب زولاً معيشتوا جهاد
كلو كلاموا عن بابورو يرشح زيتو يمكن بايظ اللباد
حب الجاية شايلا فطورو والكباية والبراد
حب العايمي فيهو الكسرة لو كان خدرة أو كداد
حب الفي جروفنا تغني في شوالا كايس كُداد
حب الفوَّت السبابة قال ما جوهو في المشهاد
حب اشياء قديمة الكسكسيكة العُمرة والمرواد
والحبوبة من التاية وكل الراحو من أجداد
ود فضل الله تشهد بي رجالتوا بلاد
الغرابة والشراقة كانوا يشردوا منو شراد
ما بيعرف حكومة ودوشة حارس أرضوا بالمرصاد
تشوفوا محل بقر مربوطة طفَّر وقلع الأوتاد
كان فقداً عظيم والله يومو الفارق الأحفاد
كانوا الناس جميعن يبكوا كل الحلة لابسي حداد
ديل أجدادنا كانو حنان وكانوا بسسيرحموا الشحاد
ولو بي كلمة حلوة وطيبة ترقد والعمر يتباد
قول للجاري فوق اعمالوا الله يغفَّل الحساد
وكل ما قالوا فوقك كلمة تبقالك وقاية وزاد
أهديكم سلام واتمنى وأطلب جملة العباد
تجاني وختمي حد ما جرُّوا في كل الطرق أوراد
يحقق لي الزمان آمالي وأكسر شوكة النقاد
وأحقق ما يجول بي خاطري زي ما حقق العقاد
وأحرق كل سفن للرجعة زي ما سوى إبن زياد
وأهدم كل جبال في دربي تصبح كل صخورا رماد
ومن بعد الهموم تتلاشى ألقاكم نصاح وشُداد
وأرجع لي دياركم تاني نتقابل ليالي جُداد
وأسيب بلداً طيور الجنة عرفت عيشا كلو فساد
والطير غير محل الخضرة دايماً مابيطيبلوا قعاد
حامد ربي ما سواني في قوم ناس ثمود أو عاد
مبسوط إني جيت في أمة .. أمة سيد الأسياد
والحال العلي طوالي إنشاء الله انتو تبقوا سُعاد
ومبروك الحياة الزوجية بي طولة العمر ووداد
ومن قلباً صدوق اتمنى أضعاف معزي ود حماد
يخلوا الدار منوِّر ديمة بس بي شرط يبقوا أولاد
عشان العصبة فيها الرهبة حتى إن كان بعوض وجراد

يديك العافيه

شكرا ليك ابراهيم