بركان حنين

بركان حنين جوة الضلوع هايج بيقذف في الحمم
كلمات مولعة كالشرار مدفوعة تخرج كالسهم
مأساتي فيك يا سمحتاً أكبر من البحر الخضم
مأساتي في البسمة اللي ماتت في الشفاه مطعونة بي سيف الألم
يا عاشق الشعر الحزين هل يرجع الضاع من عدم
هل شفت زول حاول يعبر عن هموم أصبح عدادن ذاتو هم
مارد حنين بين الضلوع لمان يصيح في إيدي يرتجف القلم
تعداد سنين مرت علي بعدك مسيخة بلا طعم
يا عشق الشعر الحزين هل شفت زول في الدنيا يتندم ندم
يرجع يعاتب نفسو من داخل الضمير ليه ابتسم
يا عاشق الشعر الحزين هل شفت زول من شِدَّ ما عقلو ازدحم
يحسب حساب قبال يتم يرجع يقول يا ربي كم
وهل شفت زول يذرف دموع مخلوطة بي اشواق ودم
وهل شفت زول صابر صبر حتى الصبر شافو اتهجم
وهل شفت زول مرت عليهو عدد سنين ما عارفو كم
يا عاشق الشعر الحزين دنيايا زي دنياك ألم
بستان أمل حاويهو بي سوراً عظيم فجأة اتهدم
أصبح دفين وغبار سنين فوقو اتردم
كيمان عذاب زي التراب يوم ظني خاب خمينا خم
أشعار نثرتها في الدروب أفضيتا كان تشفي السقم
بركان حنين بين الضلوع هايج بيقذف في الحمم
كلمات مولعة كالشرار مدفوعة تخرج كالسهم

وا رحمةللعاشقين تحملو سر الهوي والهوي فضاح

بالسر ان باحو تباح دماءهم وكزا دما العاشقين تباح

يا عشق الشعر الحزين هل شفت زول في الدنيا يتندم ندم
يرجع يعاتب نفسو من داخل الضمير ليه ابتسم

شكرا ليك يا مبدع تسلم علي المجهود الجبار