لاتقولي مع السلامة

الشاعر ابراهيم ابنعوف

لاتقولى مع السلامة

بتمشي من غير ما توادعي لا تقولى مع السلامه
برضي ما قادر اعاتبك ولاّ ارمي عليك ملامة
ليه تسافري بدون توادعى يقسى قلبك وين حنانو
كيف عليك العشرة هانت ريدنا ليه لحظاتو هانو
بين مخاوفى وشوقى ضايع لما سفرك حان اوانو
قلبي كان متمني شوفتك يا العليك تكلوا ورهانو
فى السراب صدقت مخاوفى ظنى اصبح فى مكانو
ما الزمان دايما معاند واصلوا ما مضمون أمانو
عدي فوقى العيد وروح لا معايده لا إبتسامه
من بعادك ونار فراقك قلبي عيديتو الندامه
لا خلوق طلت تبارك بي تهانيها وسلامه
لاالعيون اجفانه لا قت لا استراحت فى منامه
فى الغياب سيرتك معايا ياما ناجاك قلبي ياما
كلما لاوحلى طيفك ابكي بي دمع اليتامه
يا مسافري على بلدنا شايلى روحى معاك هديه
ليك وللناس الغلابة برضو شايف الروح شويه
داير اوادعك كنتا واكتب فى سواد عينيك وصيه
ابقي ميه على عيونك ريدنا ابقي عليهو ميه
سلمي لى على ترابنا كل شتلاتنا النديه
وقولى للوالدة الحبيبه انا جاي في عيد الضحيه
كلميلى ابوى عنك عن بنا الريد والمحبه
شيلى من بركات عيونك ادى اصحابى الاحبه
امشي يوم جمعه الضرايح زورى فيهم قبه قبه
أطرى درويشاً تلاقيه لبيسيهو أشواقى جبــــه
قولى للوطن البريدو قلبي بالاحزان معبا
غربتي الطالت شقتني وكل يوم زايدانى غربه
لما ترجعى بالسلامه جيبي لى معاك نسيمه
من بلدنا وجيبى لى من طنابرتا كم نغيمه
فوق جمر راجيك تعودي تومه لى روحى اليتيمه
تاني لى قبال تسافري وتبقي فى صيف عمرى غيمة
وتبقي فى الابد المؤبد خالدة عشرتنا الحميمه
ريدة تجمع بين قلوبنا عامره بالنيه السليمه

ياخي القصيده دي ما لي الاستاذ ابراهيم ابنعوف انما هي للشاعر السر عثمان الطيب

القصيدة دي فيها حنية شديدة

مشكووووووووووووور الشروق

مشكور ويعطيك العافية