فــــــــريع المحـــــلب

فريع المحــــــــلب

فريع المحلب الدابو اتفقع نوارو
لسع مااستوي وخلا الخلوق اتجارو

ترباية بطر حراسو علا اسوارو
شال نوم العيون حرق القلوب بي نارو
من خوفو العليو دايما مقاطع جارو
هاينبو التجار يوماتي رافع اسعارو

ريلة وادي نافره ومابتهاب مشوارو
تنجع بسنين صياده يهجر دارو
نظرة ضربة السهم البلاقي مزارو
بسمة شلعة البرق التلوح انوارو

فرع البرتكان الدابو دلا ثمارو
يلعب بالقلوب تهوي وتجر مسدارو
دهب جبل اب نقاقير غالي في معيارو
بي دربو الرجال ضربو البوادي وسارو

يوم قالت سلام (عفاضنا )غنا كنارو
سار في مهرجان موكب فرح ازهارو
حالة جات زياره قمرنا طفت انوارو
يعني ان جات اجازه النيل يقيف تيارو

زعزعت القلوب وشبابنا فيها احتارو
جرست (اب سعيد) بي شيبو حتي صغارو
(القلعه) انتحب غنايا ناح مزمارو
بهدلت (الحصايا) الكل صبح سمارو

حكمة في السماح كل زول تقع انظاو
يبقالو الكريم في الدنيا قل مقدارو
خيره في سماحه وكتين نوت تختارو
عزلت السماح عرفت مكامن اسرارو

الف الف شكر