الـــطـــمــــبــــور

الشاعر: الفاتح إبراهيم بشير


الطمبور صديقنا وعزنا وملجانا

وكتين السنين تفتح بوابة أحزانا

مما قمنا نسمع فيهو لا ملينا لا ملانا

زي إبل الرحيل شايلي السٌقا وعطشانه

أوتارو الحنيني تملِّي عايشي معانا

في الريف والحضر ومحل ما تمشي خطانا

الله لو بشيشي تداعبو إيد فنانة

تتراقص جميع الدنيا بي أركانا

لو قلبك حجر وغنانا شايفو رطانه

أول ما يرن تلقاك طربتا معانا

إحساسك يذوب قامتك تميل طربانه

زي مرّ النسيم وكتين يداعب البانه

الطمبور سماحتو القمرة مالي سمانا

الليل والسكون والرملة كالمرجانه

نتلملم نكون في شلة زاهية الوانا

نضحك ننبسط لما الصباح يلقانا

وفي رواية اخرى معروف من قديم

انو الجمال نسبي وللموجب دوام لابد من سلبي

لكن نتفق رسمي وكمان شعبي

الطمبور علاج لكل مرض عصبي

سبحان رب العباد ربي

خلا قدح حراز دبكر أصيل عربي

ومكسي جلد بقر يلصف تقول دهبي

فوقو تلات عصي واقفات بلا شعبي

وخمسه سلوك سونان موزوني بالنسبي

لو رنت تذوب ترقص جبال كجبي

والبركل يمور يتحول العقبي

ولو ما كت بخاف والناس تشيل كضبي

كنت بقول يرن تنحلا لوكربي

وأنداح الوئام بين الخلق يدبي

والبوسني الجريح يستأمن الصربي

وينشر الفرح من راجا لاوربي

لو قلبك حجر وغنانا شايفو رطانه

أول ما يرن تلقاك طربتا معانا

ارجو منكم السماح بالتنزيل يامشرفى منتديات الطمبور وشكرا لكم

الف شكـــــــــــــــــــــــــــــــــــــــــر

كنت بقول يرن تنحلا لوكربي؟؟؟؟؟؟؟؟؟؟؟؟؟؟؟ هههههههههه